So lyk jou kompetisieprys

– Baie meer as ’n intree-vlak sonkragstelsel …

– Jou energievryheid begin hier!

Ons verstaan nie almal elektrisiteit ewe goed nie, maar ons weet almal presies hoe dit voel om tydens beurtkrag daarsonder te moet klaar kom.

Daar is verskeie stelsels wat jou kan help om deur beurtkrag te kom, maar wanneer jy later ‘n stelsel wil implementeer om jou regtig meer onafhanklik van die netwerk te maak, is jy gewoonlik daartoe gedoem om jou beurtkragstelsel met iets beter te vervang en weer van vooraf geld uit te haal. Die Hawk sonkraginstallasie sal jou egter nie net gemaklik deur beurtkrag neem nie, maar die waarde daarvan is veel groter, want dit vorm die basis vir ‘n volledige energie-onafhanklike stelsel, wat jy met tyd modulêr kan uitbrei tot so groot as wat jou finale behoefte mag wees. Die kompetisiestelsel bestaan uit hoë kwaliteit SMA en BYD komponente en het die volgende vermoë:

• 1,45 kW piek energieproduksie, wat gemiddeld sowat 8 kWh se elektrisiteit per dag kan opwek – dus 240 kWh (eenhede) per maand.
• Batterye met ‘n stoorkapasiteit van 5,12 kWh.

Vir ‘n bietjie perspektief op die stelselgrootte: Die gemiddelde Suid-Afrikaanse huishouding gebruik sowat 600 eenhede elektrisiteit per maand. Hierdie sonkragstelsel kan 240 kWh (eenhede) per maand lewer. Deur ‘n bietjie ekstra te spandeer en ‘n addisionele vyf sonpanele en twee batterye vir die stelsel by te las, sou die stelsel se vermoë reeds verdubbel kon word. In samehang met die aanpassing van verbruikspatrone, sou dit baie huishoudings in staat kan stel om selfs heeltemal sonder die netwerk klaar te kom.

Belangrikste stelselkomponente

Vyf 290 W sonkragpanele met ’n piekleweringsvermoë van 1 450 W of ongeveer 8 kWh per dag.
Die Sunny Boy wisselrigter hieronder is groot genoeg om ’n addisionele vyf panele te kan akkommodeer, sodat jou stelsel se opwekkingsvermoë verdubbel kan word na 2 900 W (ongeveer 16 kWh per dag), indien jy so verkies, of later sou wou uitbrei.

Die 3kW SMA SB3.0-1AV-40 Sunny Boy wisselrigter, waarmee die batterye vanaf die sonpanele gelaai word.

Die BYD-B-BOX-5.0 batterykas met ingeboude battery beheerstelsel kan vier 2,56 kW batterye huisves.

Die nuwe generasie BYD litiumioon batterye is 2,56 kWh elk en kan 100% ontlaai word (100% DoD) vir ‘n volledige benutting van die stoorkapasiteit – in die kompetisie-installasie sal die stelsel egter opgestel word om 80% te gebruik. Ingesluit in die kompetisie-installasie is twee batterye, wat uitgebrei kan word met nog twee om ‘n totale stoorkapasiteit van 10,24 kWh (8,19 kWh @ 80%) moontlik te maak.

Die Sunny Island SMA-S14.4M-12 wisselrigter is een van die omvattendste en betroubaarste wisselrigters (”inverters”) in die industrie en maak voorsiening vir ‘n omvangryke verskeidenheid van opstellings, wat insluit kragtoevoer vanaf die netwerk, sonkragpanele, ’n kragopwekker of die batterye.

‘n Sunny Portal stelselmonitor wat jou die vermoë verskaf om intyds vanaf jou foon of rekenaar jou stelsel se energie produksie op ‘n dag, maand, jaar en alle tye basis grafies te sien en jou vriende daarmee groen te maak van jaloesie.

Installasie

Die installering van jou kompetisiestelsel sal deur HAWK Solar & Construction, ‘n SAPVIA PVGreenkaart maatskappy, enige plek in die land gedoen word en sluit die uitreik van ‘n Elektriese Sertifikaat van Voldoening vir jou stelsel in. HAWK het 25 jaar ondervinding in die industrie en beperk hulle tot die installering van kwaliteit stelsels (van huise tot groot industriële installasies).

Navrae oor die kompetisie of die sonkragstelsel kan gerig word aan navrae@kragdag.co.za